條款

使用條款及免責聲明

最後更新：3/10/2026

1. 大本營係咩

裝修師傅互助大本營（下稱「大本營」或「我哋」）只提供交流及刊登平台。師傅同判頭自行刊登搵工、請人資訊，雙方直接聯絡。大本營唔代人搵工、唔代人揀人、唔收費。

大本營唔係任何一方嘅僱主、承判商或代理人，亦唔會透過本網站或大本營群組承接或提供任何裝修工程服務。

2. 帖文內容未經核實

• 所有帖文、人工、工作條件同個人資料都係刊登者自行申報，大本營冇核實內容係咪真確。
• 證件資料（例如平安卡、建造業工人註冊、註冊電業工程人員、持牌水喉匠）由刊登者自行申報，大本營冇核實。請自行查證：註冊電業工程人員可以喺機電工程署網站查；持牌水喉匠可以喺水務署網站查；註冊建造業工人可以向建造業議會查。
• 管理員只檢查帖文有冇違反刊登規則。帖文獲刊登唔代表大本營認可、推薦或者保證任何師傅、判頭或公司。

3. 刊登規則

刊登帖文或者喺群組發言，即表示你同意遵守以下規則：

1. 內容要真實，唔可以虛假或者誤導。
2. 如屬僱傭（包括散工），工資唔可以低於法定最低工資（1/5/2026 起每小時 $43.1），並要遵守《僱傭條例》、強積金、僱員補償保險等相關法例。判工／自僱安排須符合實際工作情況。
3. 唔可以有歧視性要求，包括涉及性別、懷孕、婚姻或家庭崗位、殘疾、種族嘅要求。只可以寫同工作直接相關嘅要求（例如證件、工種經驗）。
4. 唔可以刊登身份證號碼、證件相片、客戶姓名、工地詳細地址或者其他人嘅個人資料。
5. 涉及電力、水喉或者小型工程嘅工作，須由相應嘅註冊或持牌人士進行。
6. 貼作品相前請先得到業主同意，並遮蓋門牌、地址、人樣同文件。
7. 唔好點名指控個別師傅、判頭或公司。有糾紛請向相關機構或專業人士求助（見第 5 點）。
8. 唔可以刊登違法、侵權、騷擾或者同裝修行業無關嘅推銷內容。

4. 管理員可以做嘅事

管理員可以拒絕刊登、要求修改或者刪除唔符合刊登規則嘅帖文，亦可以停用違規成員。管理員唔會代任何一方傾條件、揀人或者推薦人選。

5. 雙方自行協定及負責

• 僱傭或判工條件、工資、保險及工地安全，由雙方自行協定及負責。
• 雙方之間嘅糾紛（包括欠薪、工程質素、工傷），大本營唔承擔責任（法律唔准豁免嘅責任除外）。
• 如有糾紛，可以向勞工處、消費者委員會、小額錢債審裁處或者其他專業人士求助。

6. 責任限制

網站同群組內容只供參考，實際工程請按現場情況及向合資格人士查詢。在法律容許嘅範圍內，我哋唔會就使用大本營或者依賴帖文內容引致嘅損失負責；因我哋疏忽引致死亡或人身傷害等法律唔准豁免嘅責任除外。

7. 圖片

網站插圖由 AI 生成，只作示意，唔代表真實人物或服務。

8. 私隱

個人資料處理方式請睇私隱政策及收集個人資料聲明。

9. 條款修改及適用法律

大本營可能不時修改本條款，修改後會喺呢頁公布。本條款受香港特別行政區法律管轄。

10. 聯絡

裝修師傅互助大本營 ・ WhatsApp：5530 4100 ・ 電郵：info@pbc.ltd